給野蠻空姐的公開信

SHARON,

你近況可好?看你的BLOG,總是在遊山玩水,嘆過蔡瀾嘆世界,而我同其他香港人一樣,時常捱世界,真的好妒忌你呢!

不過作為編輯,見你的書同BLOG都咁受歡迎,心裡面都為你高興。

仲記得我們第一次見面,兩人雖然之前未見過,但就一眼認出對方了,你話我個型好編輯,我都覺得你好空姐LOOK(性格方面,你是好爽好直的,其實並唔野蠻),時為2006年9月…如果冇記錯的話…

幾個月後,你個BB便在2007年1月出世了,我當然是經手人啦—經手接生嘛,那BB便是野蠻空姐I《放飛夢想》。估不到原來你咁好生養,人家話三年抱兩,你就一年抱三,野蠻空姐II及野蠻空姐III,分別於2007年8月及2008年2月出世。

讀者FANS們,這裡要澄清一點︰野蠻空姐I是大家姐,野蠻空姐II是二家姐,野蠻空姐III是四家姐…咦!咁三家姐呢?

這個三家姐,不就是野蠻空姐BLOG嗎?

話說野蠻空姐II出世不久,我聽聞你時時同男友打情罵俏,依依泣泣,又未諗到野蠻空姐III的內容,就提議你不如正正經經整一個…BLOG,你又欣然答應,於是一個咁受歡迎的BLOG便誕生了。

回想同你愉快的合作過程,原來作者同出版社的關係可以咁琴瑟和諧,正所謂「你幫我搵錢,我幫你清倉(書倉)」,真係最佳拍檔。

期望你下次回港,帶些美食和新書大綱便夠了。你的版稅我會計好的,放心!

祝生活愉快

BY編K

廣告